𝑬𝒏𝒌𝒐𝒏𝒕𝒓𝒖 𝑷𝒓𝒆𝒑𝒂𝒓𝒂𝒔𝒂𝒖𝒏 𝑲𝒐𝒎𝒊𝒔𝒂𝒖𝒏 𝒃𝒂 𝑽𝒊𝒔𝒊𝒕𝒂 𝑷𝒓𝒊𝒎𝒆𝒊𝒓𝒖 𝑴𝒊𝒏𝒊𝒔𝒕𝒓𝒖 𝒊𝒉𝒂 𝑴𝒖𝒏𝒊𝒔𝒊́𝒑𝒊𝒖 𝑩𝒐𝒃𝒐𝒏𝒂𝒓𝒐

Maliana, 23 Fevereiru 2026 – Autoridade Munisípal Bobonaro hala’o reuniaun preparasaun ho komisaun organizadora hodi simu visita ofisial husi Primeiru Ministru Kay Rala Xanana Gusmão iha Munisípiu Bobonaro.

Reuniaun ne’e lidera husi Presidente Autoridade Munisípal, Paulo Moniz Maia, Lic. Dir. ne’ebé envolve membru komisaun sira husi área seguransa, protokolu, lojístika, saúde no komunikasaun sosial. Objetivu husi reuniaun ne’e mak atu asegura preparasaun hotu lao ho di’ak no ordenadu durante visita ne’ebé planu atu realiza iha loron hirak tuir mai.

Iha preparasaun ne’e, komisaun diskute kona-ba ajenda ofisial Primeiru Ministru, inklui vizita ba projetu dezenvolvimentu, enkontru ho lideransa lokal no komunidade sira, no mos momentu dialogu ho funsionáriu públiku sira iha Munisípiu.

Presidente Autoridade Munisípal hateten katak visita ne’e importante tebes hodi haree diretamente progresu dezenvolvimentu iha Bobonaro no mos atu rona aspirasaun komunidade sira. Nia mos husu ba komisaun hotu-hotu atu servisu ho responsabilidade no koordinasaun di’ak.

Ho preparasaun ne’ebé metin no koordenadu, Autoridade Munisípal Bobonaro espera katak visita Primeiru Ministru sei fó impaktu positivu ba implementasaun politika desentralizasaun nomos poder lokal iha futuru.

#Media_Portal_Municipal

#Presidente Autoridade Municipio Bobonaro

Bobonaro, 20 de Fevereiru 2026, Sua Eccelencia Presidente Autoridade Municipio Bobonaro Sr.Paulo Moniz Maia, Lic.Dir.

Hamutuk ho Secretario Asuntu Finansas, Secretario Asuntu Planeamento, Secretario asunto Sociais, linhas Directores Servisu Municipais, Funsionario sira hotu, estudante estajiadu. Halao limpeza jeral iha resinto Autoridade Municipio Bobonaro ba to Ginasio Gor Maliana.

#Media_Portal_Municipal

Ohin loron 19 Febereiru 2026, Presidente Autoridade Munisipal Bobonaro, Paulo Moniz Maia, Lic. Dir., ofisialmente halo serimónia Tomada de Posse ba Quintino Santos de Jesus, nundar Administrador Posto Lolotoe, iha Salaun Maria Tapo, Munisípiu Bobonaro. Serimónia ne’e realiza ho objetivu atu fó lejitimidade no responsabilidade ofisial ba lideransa foun iha nivel Posto Administrativu.

Iha eventu ne’e, Presidente Autoridade Munisipal hato’o nia mensajen katak Administrador Posto tenke servisu komunikativu, transparénsia no kopera ho entidades hotu no komunidade sira hodi promove dezenvolvimentu iha Posto Lolotoe. Nia mos enfatiza katak kolaborasaun entre autoridade lokal, lider komunitaria no instituisaun sira importante tebes atu garante servisu públiku ne’ebé di’ak no efisiente.

Administrador Posto foun ne’ebé foin simu tomada de posse hato’o nia kompromisu atu hala’o knaar tuir lei no regulamentu ne’ebé vigora, no prontu atu simu sujestaun no kritika konstrutiva husi komunidade sira. Nia afirma katak prioridade prinsipal mak haforsa governasaun ne’ebé inkluzivu no responde ba nesesidade povu.

Serimónia ne’e partisipa husi Estrutura Administrasaun munisipal, Komando Munisipal PNTL Bobonaro, Diretor Delegasaun territorial, Adminitrador Posto Administrativu, Chefe Suku sira husi Posto Lolotoe, no familia empossado ne’ebé marka momentu importante ida ba kontinuidade servisu administrativu iha Posto Administrativu Lolotoe.

#Media_Portal_Municipio