𝐌𝐚𝐥𝐢𝐚𝐧𝐚, 𝐒𝐞𝐬𝐭𝐚-𝐅𝐞𝐢𝐫𝐚, 𝟎𝟐 𝐎𝐮𝐭𝐮𝐛𝐫𝐮 𝟐𝟎𝟐𝟔 – Sua Exelénsia Prezidente Autoridade Munisípiu Bobonaro, Sr. Paulo Moniz Maia, Lic.Dir, partisipa iha atividade marsa ba páz ho tema “𝐶𝑎𝑚𝑖𝑛ℎ𝑎𝑑𝑎 𝑝𝑒𝑙𝑎 𝑛𝑎̃𝑜-𝑣𝑖𝑜𝑙𝑒̂𝑛𝑐𝑖𝑎 𝑗𝑢𝑛𝑡𝑜𝑠 𝑝𝑒𝑙𝑎 𝑝𝑎𝑧”, ne’ebé organiza husi eskola CAFE DE MALIANA.

Atividade refere ho objetivu atu selebra loron mundiál ba páz, ne’ebé monu iha loron 21 fulan Setembru liubá. Iha mós objetivu prinsipál sira hanesan;

1. Sensibiliza ba estudante sira no komunidade kona-bá kultura páz nian no naun-violénsia;

2. Hametin sentidu sidadania no partisipasaun komunitária, dezenvolve relasaun di’ak entre eskola, komunidade no família;

3. Konsolida aprendizajen kona-bá direitus umanus liu husi prátika.

Iha intervensaun, Exelénsia prezidente hato’o parabéns ba manorin nain sira ne’ebé ho inisiativa di’ak hodi organiza atividade refere, nune’e bele promove liután páz iha estudante sira nia leet, iha ambiente eskola, iha komunidade no iha família.

Partisipa mós iha atividade refere, Komandante Komando Polísia Munisípiu Bobonaro, Komandante Bombeirus Munisípiu Bobonaro, Superentendenti Edukasaun Munisípiu Bobonaro, Membru Polísia sira, Professores husi CAFE Maliana, inan-aman sira, estudante sira inklui média destakadu sira.

𝐑𝐞𝐦𝐚𝐭𝐚 “𝐌𝐞́𝐝𝐢𝐚 𝐏𝐀𝐌 𝐁𝐨𝐛𝐨𝐧𝐚𝐫𝐨”