𝐌𝐚𝐥𝐢𝐚𝐧𝐚, 𝐓𝐞𝐫𝐬𝐚-𝐅𝐞𝐢𝐫𝐚, 𝟐𝟐 𝐒𝐞𝐭𝐞𝐦𝐛𝐫𝐮 𝟐𝟎𝟐𝟔 – Sua Exelénsia Prezidente Autoridade Munisípiu Bobonaro, Sr. Paulo Moniz Maia, Lic.Dir, partisipa iha atividade destruisaun bá materiál eleitorál ne’ebé uza ona iha eleisaun prezidensiál 2022 no eleisaun parlamentár 2023 nomós dokumentus eleitorais ne’ebé kaduka ona.

Atividade ida ne’e hala’o bazeia bá responsabilidade ne’ebé atribui bá Sekretariadu Tékniku Administrasaun Eleitorál (STAE), tuir artigu 68, númeru 2, husi Dekretu Governu Nú. 21/2017, 17 Maiu, no artigu 55, númeru 2, husi Dekretu Governu Nú. 7/2017, 27 Fevereiru, kona-bá prosedimentu votasaun, kontajen no apuramentu rezultadu.

Iha intervensaun, Exelénsia Prezidente hateten katak, Autoridade sempre prontu hodi kolabora ho servisus delegasaun teritoriál sira inklui STAE no CNE hanesan instituisaun ne’ebé toma responsável ba prosesu Eleisaun sira. Aliende ne’e, Exelénsia Prezidente mós afirma katak atividade ne’e importante tebes, atu fó espasu ne’ebé sufisiente bá STAE hodi bele simu fali materiál foun ne’ebé sei utiliza iha eleisaun sira tuirmai.

Materiál sira ne’ebé destrui mak hanesan; Boletin votu, akta, lista votante, tinta indelível, kartaun eleitorál aat ne’ebé rekolla durante atualizasaun baze dadus eleitorál, no dokumentu eleitorál seluk ne’ebé kaduka ona, tuir inventáriu no prosedimentu ne’ebé determina.

Atividade refere partisipa mós husi reprezentante CNE Munisípiu Bobonaro, Reprezentante Komandante Komando Polísia Munisípiu Bobonaro, Administradór Postu Administrativu Maliana, Reprezentante husi Partido Polítiku Asentu Parlamentár, Xefe Suku sira no funsionáriu sira iha STAE munisípiu Bobonaro.

#𝙍𝙚𝙢𝙖𝙩𝙖

#𝙈𝙚́𝙙𝙞𝙖 𝙋𝘼𝙈 𝘽𝙤𝙗𝙤𝙣𝙖𝙧𝙤