Maliana, 04/08/2026, Sua Exelénsia Prezidente Autoridade Munisípiu Bobonaro, Sr. Paulo Moniz Maia, Lic. Dir, halo abertura ba atividade sosializasaun ba jestaun transportasaun materiais konstrusaun iha Salaun Maria Tapo, Autoridade Munisipál Bobonaro (AMB).

Iha nia diskursu hateten katak “Agradese tebes ba Autoridade Nasionál dos Minerais ne’ebé iha inisiativa hodi realiza workshop ida ne’e. Atividade workshop ka sosializasaun ida ne’e importante tebes, tamba bele fó hanoin mai ami hanesan Autoridade lokál tantu iha Suku, Postu no Munisípiu atu toma atensaun ba asuntu sira hanesan ne’e. Munisípiu Bobonaro iha projetu barak, tantu projetu ki’ik no grande projetu sira, nune’e utilizasaun ba materiais konstrusaun mós ho volume ne’ebé barak. Fó hanoin mós ba Autoridade lokál sira liuliu Xefe Suku no Administradór postu Administrativu sira atu superviziona no monitoriza projetu sira ne’ebé implementa iha ita boot sira nia área nune’e labele estraga fali ambiente no natureza.”

Atividade refere ho nia objetivu atu sosializa kona ba papel husi Autoridade Nasionál dos Minerais (ANM) relasiona ho jestaun transportasaun karga (tula) material konstrusaun hanesan fatuk, rai no raihenek husi Autoridade minerais, ne’ebé sirkula iha territóriu nasionál (Timor-Leste), espesifikamente munisípiu Bobonaro.

Atividade refere marka mós prezensa husi parte seguransa nian hanesan Comandante do Comando Munisípiu Polísia Bobonaro, Komandante Polísia Eskuadra, Ofisiál Polísia Suku no membru sira seluk. Nune’e mós Administradór Postu Administrativu, Xefe Suku ho nia membru sira.

#Remata

#Média PAM Bobonaro