𝑨𝑻𝑰𝑽𝑰𝑫𝑨𝑫𝑬 𝑬𝑵𝑲𝑶𝑵𝑻𝑹𝑼 𝑲𝑶𝑶𝑹𝑫𝑬𝑵𝑨𝑺𝑨𝑼𝑵 𝑵𝑶 𝑽𝑰𝒁𝑰𝑻𝑨 𝑻𝑬𝑹𝑬𝑵𝑼 𝑯𝑶𝑫𝑰 𝑯𝑨𝑫𝑰𝑨 𝑱𝑬𝑺𝑻𝑨𝑼𝑵 𝑩𝑬𝑬 𝑴𝑶𝑺 𝑰𝑯𝑨 𝑷.𝑨 – 𝑨𝑻𝑨𝑩𝑨𝑬.
Quinta-feira, 16 de Abril de 2026, ekipa husi Diresaun SMAONG e OC hala’o enkontru ho parseiru internasionál PARTISIPA, APA Atabae, Chefe Departamentu Diresaun Nasional Regulasaun Agua e Saneamentu (DNRAS), chefe suku Aidabaleten, Rairobo, Hataz no Atabae, nune’e mos ho grupu GMF (Gestaun Manejamentu Fasilidade Be’e Mos).
Enkontru ne’e realiza iha Salaun Postu Administrativu Atabae ho objetivu prinsipal atu diskute, avalia no koordena servisu sira relasiona ho jestaun bee mos iha área refere, nune’e mos atu reforsa koperasaun no sinerjia entre parseiru sira hotu iha nivel komunidade. Iha diskusaun ne’e, partisipante sira troka informasaun kona-ba progresu servisu, dezafiu sira ne’ebé hasoru iha terenu, no buka solusaun konjunta hodi garante sustentabilidade ba fasilidade bee mos ne’ebé iha ona.
Reprezentante sira husi kada entidade mos hato’o sira nia hanoin no esperiénsia kona-ba jestaun bee mos, inklui importánsia envolvimentu komunidade nian iha manutensaun no jestaun fasilidade, atu nune’e sistema bee mos bele funsiona ho di’ak no kontinua fó benefísiu ba ema hotu. Chefe suku sira mos enfatiza nesesidade atu hametin kooperasaun entre autoridade lokal no parseiru dezenvolvimentu sira, atu bele responde di’ak liu ba nesesidade komunidade nian.
Iha oportunidade ne’e, ekipa mos halo vizita direta ba fatin hodi haree kondisaun tanki bee ne’ebé komunidade konstrui ho inisiativa rasik. Tanki refere utiliza atu rai no distribui bee ne’ebé liga husi bee matan, ne’ebé sai hanesan fontes importante ba komunidade iha asesu ba bee mos. Vizita ne’e mos permite ekipa atu observa diretamente sistema ne’ebé eziste, identifika pontu forte no fraqueza sira, no fó rekomendasaun teknika atu hadia liu tan jestaun no manutensaun fasilidade refere.
Liu husi enkontru no vizita ne’e, espera katak koperasaun entre parseiru sira sei sai di’ak liu tan, no komunidade bele hetan apoiu ne’ebé presiza atu garante asesu ba bee mos ne’ebé seguru, sufisiente no sustentavel ba tempu naruk.
PV_SMAONGeOC
