𝑨𝒕𝒊𝒗𝒊𝒅𝒂𝒅𝒆 𝑺𝒐𝒔𝒊𝒂𝒍𝒊𝒛𝒂𝒔𝒂𝒖𝒏 𝑴𝒂𝒕𝒂 𝑫𝒂𝒍𝒂𝒏 𝑷𝑵𝑫𝑺 2026 𝑵𝒊𝒗𝒆𝒍 𝑴𝒖𝒏𝒊𝒄𝒊́𝒑𝒊𝒖

𝑨𝒕𝒊𝒗𝒊𝒅𝒂𝒅𝒆 𝑺𝒐𝒔𝒊𝒂𝒍𝒊𝒛𝒂𝒔𝒂𝒖𝒏 𝑴𝒂𝒕𝒂 𝑫𝒂𝒍𝒂𝒏 𝑷𝑵𝑫𝑺 2026 𝑵𝒊𝒗𝒆𝒍 𝑴𝒖𝒏𝒊𝒄𝒊́𝒑𝒊𝒖

Dirasaun Programa Nasional Dezenvolvimentu Suku (PNDS) realiza atividade Sosializasaun Mata Dalan PNDS 2026 iha nivel Municípiu ho objetivu atu fó kompriensaun kle’an ba lideransa lokal no estrutura sira kona-ba prosesu no prioridade programa ba tinan 2026.

Atividade ne’e realiza iha sala reuniaun Municípiu, ho partisipasaun husi Presidente Autoridade Municípiu Bobonaro, ekipa tekniku PNDS, Xefe do Postu Administrativu 6, Xefe Suku 50 no reprezentante estrutura suku sira. Sosializasaun ne’e importante tebes atu asegura katak planeamentu no implementasaun programa PNDS 2026 bele lao tuir mata dalan ne’ebé klaru no transparante.

Iha oportunidade ne’e, ekipa PNDS esplika kona-ba etapas implementasaun programa, husi prosesu identifikasaun prioridade iha nivel suku, validasaun proposta, to’o mekanizmu monitorizasaun no relatoriu. Aleinde ne’e, partisipa sira mós hetan oportunidade atu fó pergunta no diskute kona-ba desafiu sira ne’ebé bele mosu durante implementasaun.

Ho realizasaun Sosializasaun Mata Dalan PNDS 2026 ne’e, Governu espera katak lideransa no komunidade iha nivel suku bele prepara an di’ak hodi determina prioridade dezenvolvimentu ne’ebé responde ba nesesidade real komunidade nian, atu nune’e programa PNDS bele lori benefísiu maksimu ba povu espesial ba iha Municípiu Bobomaro nebe prepara a’an atu simu poder lokal.

Papel importante husi PNDS iha atividade Sosializasaun Mata Dalan PNDS 2026 Nivel Municípiu mak hanesan tuir mai:

1. Fó orientasaun no mata dalan klaru
PNDS iha papel atu esplika regra, prosedimentu no etapas implementasaun programa ba tinan 2026, atu hotu-hotu kompriende hanesan saida mak tenke halo husi nivel suku to’o nivel munisípiu.

2. Garante transparénsia no akuntabilidade
Husi sosializasaun ne’e, PNDS asegura katak prosesu planeamentu no jestaun orsamentu lao ho klaru, loke no tuir regulamentu governu nian.

3. Fasilita planeamentu participativu
PNDS enkoraža lideransa suku no komunidade atu partisipa ativamente iha identifikasaun prioridade dezenvolvimentu tuir nesesidade real komunidade nian.

4. Hametin koordenasaun entre nivel sira
Atividade ne’e ajuda hametin relasaun servisu entre nivel nasional, munisípiu, postu administrativu no suku, atu implementasaun programa bele lao ho di’ak.

5. Prepara implementasaun ba tinan 2026
Ho kompriensaun ne’ebé klaru, estrutura sira bele prepara proposta no planu atividade ho di’ak, hodi nune’e evita sala prosedimentu iha futuru.

Iha resumen, papel PNDS iha atividade ne’e mak atu asegura katak programa dezenvolvimentu iha suku sira bele lao ho planeamentu di’ak, transparante no fó benefísiu ba komunidade.

#Media_PNDS