𝑨𝑻𝑰𝑽𝑰𝑫𝑨𝑫𝑬 𝑯𝑨𝑫𝑰𝑨 𝑲𝑨𝑵𝑨𝑳 𝑰𝑹𝑰𝑮𝑨𝑺𝑨𝑼𝑵 𝑴𝑨𝑳𝑰𝑨𝑵𝑨 1 𝑯𝑬𝑻𝑨𝑵 𝑬𝑺𝑻𝑹𝑨𝑮𝑼 𝑯𝑼𝑺𝑰 𝑹𝑨𝑰 𝑯𝑨𝑳𝑨𝑰

𝑨𝑻𝑰𝑽𝑰𝑫𝑨𝑫𝑬 𝑯𝑨𝑫𝑰𝑨 𝑲𝑨𝑵𝑨𝑳 𝑰𝑹𝑰𝑮𝑨𝑺𝑨𝑼𝑵 𝑴𝑨𝑳𝑰𝑨𝑵𝑨 1 𝑯𝑬𝑻𝑨𝑵 𝑬𝑺𝑻𝑹𝑨𝑮𝑼 𝑯𝑼𝑺𝑰 𝑹𝑨𝑰 𝑯𝑨𝑳𝑨𝑰

Maliana 02/02/2026 Kanal irigasaun Maliana 1 hetan estragu boot hafoin akontese rai halai iha area ne’e, ne’ebé afeta diretamente ba sistema bee ba to’os no natar sira. Akontesimentu ne’e halo bee la lao normal ba rai to’os, liu-liu ba to’os hare ne’ebé presiza bee atu sustenta moris ai-horis.

Tuir informasaun husi Autoridade Lokal no tekniku irigasaun, rai halai ne’e mosu tanba udan bo’ot ne’ebé monu durante loron balu ikus ne’e. Rai ne’ebé monu taka parte husi kanal no estraga estrutura balu, hodi impede fluxo bee ba área agrikultura.

Estragu ne’e halo preokupasaun ba agrikultor sira iha Maliana liu-liu toos nain nebe pertense ba kanal irigasaun Maliana 1, tamba maioria dependente ba kanal ne’e atu usa ba sira-nia natar. Se la halo reparasaun lalais, bele afeta produtividade no kolheita iha tempu oin mai.

Autoridade relevante hatete katak ekipa tekniku sei halo avaliasaun kompletu no prepara planu atu hadi’a kanal ne’e lalais. Komunidade mos husu atu governu no entidade kompetente sira fó atensaun urjente hodi prevene impaktu boot liu tan ba setor agrikultura.

To’o agora, servisu limpeza no reorganizasaun rai ne’ebé taka kanal seidauk remata, maibé esforcu hamutuk entre governu no komunidade kontinua atu restaura fila fali funsionamentu normal kanal irigasaun Maliana 1.

Dirasaun Serviso Municipal Agrikultura liu husi responsavel grupo to’os nain organiza ho to’os nain nebe uja kaal irigasaun ida ne’e tun direta ba hadia kedan iha fatin nebe fo impaktu rai halai no estraga kanal refere. Parte ida ne’e hanesan apoio emerjensia hodi bele normalija fila fali lalais kanal ida ne’e no komunidade to’os nain bele uja fila fali bee ba ida-idak nia to’os.

Media DSMAB