𝑨𝑻𝑰𝑽𝑰𝑫𝑨𝑫𝑬 𝑹𝑬𝑼𝑵𝑰𝑨𝑼𝑵 𝑺𝑻𝑬𝑬𝑹𝑰𝑵𝑮 𝑪𝑶𝑴𝑴𝑰𝑻𝑻𝑬𝑬 𝑱𝑬𝑺𝑻𝑨𝑼𝑵 𝑩𝑬’𝑬 𝑺𝑼𝑲𝑼
Segunda-feira, 20 de Abril de 2026, Autoridade Munisípiu Bobonaro liu husi Diresaun Servisu Municipal Apoiu ONG no Organizasaun Komunitária (SMAONGeOC) servisu hamutuk ho Diresaun Servisu Munisipal Água, Saneamentu no Ambiente (SMASA), Administrasaun Postu Atabae no parseiru internasionál PARTISIPA, implementa ona modelu aprosimasaun foun ida ba mekanismu jestaun efetivu bee mos liu husi estrutura suku ne’ebé hanaran Jestaun Bee Suku (JBS).
Programa ida ne’e hahú implementa iha fulan Julhu tinan 2025 ho objetivu atu halo introdusaun modelu JBS iha eskala pilotu iha Postu Administrativu Atabae. To’o agora, programa refere kobre ona suku 4 ho aldeia 20, ho total sistema bee mos hamutuk 16 no grupu Maneja Fasilidade (GMF) hamutuk 16 ne’ebé envolve diretamente iha jestaun no manutensaun fasilidade bee mos iha komunidade.
Iha kontestu nasional, Diresaun Nasional Regulasaun Água no Saneamentu (DNRAS) husi Ministériu Obras Públiku, hanesan instituisaun reguladora iha setor bee nian, hala’o enkontru komisaun servisu ho membru Komisaun Servisu Jestaun Bee Suku (JBS) atu atualiza progresu no identifika dezafiu sira iha implementasaun programa pilotu refere. Alende ne’e, enkontru ne’e mos diskute mata dalan ka estratéjia sira ne’ebé produs ona hodi garante implementasaun JBS bele lao ho efetivu no sustentavel iha futuru.
Enkontru servisu refere realiza iha Salaun ETDA, Dili, ho partisipasaun husi entidade relevante sira ne’ebé iha responsabilidade direta ba dezenvolvimentu no regulasaun setor bee mos iha Timor-Leste.
Programa Jestaun Bee Suku (JBS) iha objetivu espesífiku atu reforça lideransa suku sira iha sira nia papel direta hodi apoiu servisu GMF, liu husi fortalese kapasidade komunidade nian iha operasaun no manutensaun sistema bee mos, liuliu iha área rurál sira. Inisiativa ida ne’e espera bele hadi’a asesu komunidade ba bee mos ne’ebé seguru no sustentavel. Ao mesmu tempu kontribui ba dezenvolvimentu setor bee mos iha nivel nasionál.
#remata
#Media_SM_ONG e Oc
