๐จ๐ป๐ฐ๐ฝ๐ฐ๐ซ๐จ๐ซ๐ฌ ๐น๐ฌ๐ผ๐ต๐ฐ๐จ๐ผ๐ต ๐บ๐ป๐ฌ๐ฌ๐น๐ฐ๐ต๐ฎ ๐ช๐ถ๐ด๐ด๐ฐ๐ป๐ป๐ฌ๐ฌ ๐ฑ๐ฌ๐บ๐ป๐จ๐ผ๐ต ๐ฉ๐ฌโ๐ฌ ๐บ๐ผ๐ฒ๐ผ
Segunda-feira, 20 de Abril de 2026, Autoridade Munisรญpiu Bobonaro liu husi Diresaun Servisu Municipal Apoiu ONG no Organizasaun Komunitรกria (SMAONGeOC) servisu hamutuk ho Diresaun Servisu Munisipal รgua, Saneamentu no Ambiente (SMASA), Administrasaun Postu Atabae no parseiru internasionรกl PARTISIPA, implementa ona modelu aprosimasaun foun ida ba mekanismu jestaun efetivu bee mos liu husi estrutura suku neโebรฉ hanaran Jestaun Bee Suku (JBS).
Programa ida neโe hahรบ implementa iha fulan Julhu tinan 2025 ho objetivu atu halo introdusaun modelu JBS iha eskala pilotu iha Postu Administrativu Atabae. Toโo agora, programa refere kobre ona suku 4 ho aldeia 20, ho total sistema bee mos hamutuk 16 no grupu Maneja Fasilidade (GMF) hamutuk 16 neโebรฉ envolve diretamente iha jestaun no manutensaun fasilidade bee mos iha komunidade.
Iha kontestu nasional, Diresaun Nasional Regulasaun รgua no Saneamentu (DNRAS) husi Ministรฉriu Obras Pรบbliku, hanesan instituisaun reguladora iha setor bee nian, halaโo enkontru komisaun servisu ho membru Komisaun Servisu Jestaun Bee Suku (JBS) atu atualiza progresu no identifika dezafiu sira iha implementasaun programa pilotu refere. Alende neโe, enkontru neโe mos diskute mata dalan ka estratรฉjia sira neโebรฉ produs ona hodi garante implementasaun JBS bele lao ho efetivu no sustentavel iha futuru.
Enkontru servisu refere realiza iha Salaun ETDA, Dili, ho partisipasaun husi entidade relevante sira neโebรฉ iha responsabilidade direta ba dezenvolvimentu no regulasaun setor bee mos iha Timor-Leste.
Programa Jestaun Bee Suku (JBS) iha objetivu espesรญfiku atu reforรงa lideransa suku sira iha sira nia papel direta hodi apoiu servisu GMF, liu husi fortalese kapasidade komunidade nian iha operasaun no manutensaun sistema bee mos, liuliu iha รกrea rurรกl sira. Inisiativa ida neโe espera bele hadiโa asesu komunidade ba bee mos neโebรฉ seguru no sustentavel. Ao mesmu tempu kontribui ba dezenvolvimentu setor bee mos iha nivel nasionรกl.
#remata
#Media_SM_ONG e Oc
