CAILACO, 08 Agostu 2026, S.E. Primeiru-Ministru (PM), Kay Rala Xanana Gusmão, akompaña husi Prezidente Autoridade Munsípiu Bobonaro no Ministru Obras Públiku, ofisialmente lansa fatuk dahuluk projetu Estrada Nasionál ne’ebé liga Maliana, Cailaco ba Hatolia, Munisipiu Ermera, inklui Reabilita mós Ponte Bilimau, iha Munisípiu Bobonaro.
Iha intervensaun Exselénsia prezidente Autoridade hato’o agradese ba IX Governu konstitusionál lideradu husi Maun Boot Kay Rala Xanana Gusmão ne’ebé sempre tau atensaun no prioridade ba preokupasaun povu ne’e nian.
“Hodi povu Munisípiu Bobonaro tomak no Autoridade nia naran, ho haksolok no hakraik-an ami hato’o ami nia Boas Vindas ba: Sua Exselénsia Priméiru Ministru – Maun Boot Kay Rala Xanana Gusmão ho membru governu sira hotu ne’ebé ohin prezente iha serimónia Lansamentu fatuk dahuluk ba reabilitasaun estrada urbana Maliana ba Bilimau iha Munisípiu Bobonaro.”
“Nudár ita hatene, estrada liga Maliana ba Bilimau no liu ba Ermera iha kondisaun ida grave tebes e liliu iha tempu udan. Iha tinan ida ikus ne’e, ponte Samutuaben kotu hodi prejudika ba asesu transporte sira no difikulta atividade sira hotu inklui ekonomia. Ho lansamentu ohin, marka pasu signifikante ida hodi mellora kondisaun estrada ne’ebé grave hodi loke izolasaun no fó oportunidade barak liu tan ba asesu ne’ebé viabel liu.”
Projetu ne’e konsidera hanesan pasu importante ida hodi hadi’a infraestrutura estrada no ponte hodi fasilita mobilidade komunidade, no hametin koneksaun entre área sira iha Munisípiu Bobonaro no Munisipiu Ermera, entretantu Projetu Estrada ne’e sei konstrui husi kompañia internasionál 𝗕𝗜𝗡𝗔 𝗠𝗜𝗧𝗥𝗔 𝗜𝗡𝗗𝟬 𝗦𝗘𝗝𝗔𝗛𝗧𝗘𝗥𝗔 ho durasaun servisu tinan ida ho balun tuir kontratu ne’ebé asina ona.
Exselénsia Prezidente Autoridade mós akresenta tan katak, “agradese mós ba S.E Señor Ministru das Obras Pública, S.E Señor Ministru de Planeamentu e investimentu estratéjiku, S.E Señor Ministru Administrasaun Estatál ne’ebé sempre lori ami Munisípiu nia difikuldade sira hotu to’o iha ita boot sira nia meja.
Hanesan Prezidente Autoridade, ha’u hakarak husik hela mensajen ida ba kompaña implementadór atu kumpri padraun kualidade ne’ebé selebra ona iha kontratu no kalendariu de ezekusaun ninian. Ha’u sei orienta Servisus Munisipál Obras Públika ho regularmente tau matan ba ezekusaun obra ida ne’e hodi asegura katak nia implementasaun bele la’o tuir BOQ no kumpri kalendariu sira hotu.”
Partisipa iha serimónia lansamentu ne’e, Ministru Transportes no Komunikasoins, Miguel Marques Gonçalves Manetelu, Ministru Agrikultura, Pekuária, Peska no Florestas, Marcos da Cruz, Vise-Ministru Administrasaun Estatál, Jacinto Rigoberto G. de Deus, Vise-Ministru ba Infraestruturas, Júlio do Carmo, Sekretáriu Estadu Asuntu Toponímia no Organizasaun Urbana, Germano Santa Brites Dias, Prezidente Komisaun E iha Parlamentu Nasionál Asuntu Infraestrutura, Marcos Xavier, IGTL, ADN,I.P, CNA, Sekretáriu Grande Projetu, Xefe Gabinete Vise-Ministru Infraestrutura, Xefe Gabinete MOP, Cristovão Fausto Guterres, Komandante PNTL Munisípiu Bobonaro, F-FDTL, Diretór Servisus Munisipais, Administradór Postu Administrativu 6 inklui Cailaco, Lideransa lokál husi suku 8, Atudara, Dau Udu (Dau Udo), Goulolo, Guenu Lai, Manapa, Meligo, Purugua no Raiheu, reprezentante veteranus, komunidade, lia nain no estudante sira.
#Remata
#Media PAM Bobonaro
