Maliana, 03/08/2026, Exelénsia Prezidente Autoridade Munisípiu Bobonaro, Sr. Paulo Moniz Maia, Lic.Dir, hala’o enkontru ho ekipa husi DMTC no ADB hodi diskute kona ba planu konstrusaun Terminal-Tunubibi no parajen iha Maliana.

Ministériu Transporte no Komunikasaun liu husi Diresaun Munisipál Transporte no Komunikasoens Munisípiu Bobonaro halo kordenasaun no konsulta ho parte Autoridade Munisipál kona ba project diligence ba projetu desenvolvimentu fasilidade transporte públiku (Terminal).

Projetu refere hala’o iha Novembru 2022 liu husi asistente téknika ne’ebé fornese husi Asian Development Bank (ADB) hodi prodús Timor-Leste Public Transport Master Plan no Feasibility Study Report ne’ebé lansa iha 2024. Nune’e enkontru refere hanesan kontinuasaun projetu ba faze tuir mai, tamba ne’e ekipa husi MTC no ADB sei hala’o due diligence ba projetu ida ne’e hodi haree no konfirma preparasaun ba projetu (Project readiness).

Depois de enkontru ekipa DMTC no ADB hamutuk ho Exelénsia Prezidente Autoridade hala’o kedas vizita ba fatin identifikadu ba projetu refere.

Enkontru ne’ebé realiza iha salaun VIP Autoridade Munisipál ne’e, partisipa husi reprezentante husi MTC, ekipa husi ADB, DMTC Munisípiu Bobonaro, konsultan sira, no asesór sira.

#Remata

#“Media PAM Bobonaro”