𝐁𝐨𝐛𝐨𝐧𝐚𝐫𝐨, 𝐊𝐮𝐚𝐫𝐭𝐚-𝐟𝐞𝐢𝐫𝐚, 𝟔 𝐌𝐚𝐢𝐮 𝟐𝟎𝟐𝟔—𝐒.𝐄. 𝐕𝐢𝐬𝐞-𝐌𝐢𝐧𝐢𝐬𝐭𝐫𝐮 𝐀𝐝𝐦𝐢𝐧𝐢𝐬𝐭𝐫𝐚𝐬𝐚𝐮𝐧 𝐄𝐬𝐭𝐚𝐭𝐚𝐥, 𝐉𝐚𝐜𝐢𝐧𝐭𝐨 𝐑𝐢𝐠𝐨𝐛𝐞𝐫𝐭𝐨 𝐆𝐨𝐦𝐞𝐬 𝐝𝐞 𝐃𝐞𝐮𝐬, halo vizita supreza ba Autoridade Munisípiu Bobonaro, ho objetivu atu hare diretamente implementasaun servisu 19 ne’ebé atribui ona ba autoridade munisípiu.

Iha vizita ne’e, Vise-Ministru foka liu ba área importante sira hanesan finansa públika, jestaun rekursu umanu, planu aprovizionamentu, planu ezekusaun orsamentu, jestaun arkivu, no revizaun informasaun demográfika. Aleinde ne’e, S.E. Vice Ministro MAE visita diresaun ida-idak hodi rona diretamente preokupasaun no dezafiu sira ne’ebé diresaun sira hasoru iha implementasaun servisu iha terrenu.

Vizita supreza ne’e atu garante katak jestaun administrativu no finanseiru iha nível munisípiu funsiona ho di’ak, transparente, no tuir regulamentu ne’ebé aplika. Inisiativa ida ne’e mos reflete kompromisu governu atu hasa’e efisiénsia, transparénsia no responsabilidade iha administrasaun públika.

Iha okaziaun ne’e, Prezidente Autoridade Munisípiu Bobonaro, Paulo Moniz Maia, hato’o husu ba Governu sentrál atu kontinua fó apoiu liu husi formasaun kapasitasaun ba funsionáriu sira iha kada diresaun. Nia hateten katak formasaun sira ne’e importante atu hasa’e koñesimentu no kapasidade téknika, hodi hadi’a liu tan kualidade servisu públiku no hatán di’ak liu ba nesesidade komunidade.

#Media_Portal_Municipio

#Media_Presidente_Autoridade_Municipio_Bobonaro