𝑰𝑵𝑨𝑼𝑮𝑼𝑹𝑨𝑺𝑨𝑼𝑵 𝑺𝑨𝑳𝑨 𝑴𝑨𝑻𝑬𝑹𝑵𝑰𝑫𝑨𝑫𝑬 𝑭𝑶𝑼𝑵 𝑰𝑯𝑨 𝑺𝑺𝑲 𝑲𝑨𝑲𝑨𝑵𝑰𝑨𝑯𝑨𝑺𝑨’𝑬 𝑺𝑬𝑹𝑽𝑰𝑺𝑼 𝑺𝑨𝑼́𝑫𝑬 𝑴𝑨𝑻𝑬𝑹𝑵𝑨 𝑰𝑯𝑨 𝑩𝑶𝑩𝑶𝑵𝑨𝑹𝑶

𝑰𝑵𝑨𝑼𝑮𝑼𝑹𝑨𝑺𝑨𝑼𝑵 𝑺𝑨𝑳𝑨 𝑴𝑨𝑻𝑬𝑹𝑵𝑰𝑫𝑨𝑫𝑬 𝑭𝑶𝑼𝑵 𝑰𝑯𝑨 𝑺𝑺𝑲 𝑲𝑨𝑲𝑨𝑵𝑰𝑨𝑯𝑨𝑺𝑨’𝑬 𝑺𝑬𝑹𝑽𝑰𝑺𝑼 𝑺𝑨𝑼́𝑫𝑬 𝑴𝑨𝑻𝑬𝑹𝑵𝑨 𝑰𝑯𝑨 𝑩𝑶𝑩𝑶𝑵𝑨𝑹𝑶

Bobonaro, 23 Abril 2026 – Governu no povu Japaun, liu-husi Organizasaun Internasional Frontline no Embaixada Japaun iha Timor-Leste, inaugura no entrega sala maternidade iha Sentru Saude Komunitária (SSK) Kakania, suku Lourba, Postu Administrativu Bobonaro, Munisípiu Bobonaro, ba Governu atu hasa’e atendimentu saúde materna ba inan isin-rua sira.

Diretór Frontline iha Timor-Leste, Yohei Kawaguchi, hateten katak instalasaun foun ida-ne’e konstrui hanesan estensaun ba SSK Lourba, ne’ebé anteriormente hetan ona apoiu sistema painel solar no ekipamentu ultrasonografia. Projetu ida-ne’e destina atu sai sentru saúde maternu-infantil, ho objetivu atu fornese ambiente seguru ba feto isin-rua sira atu partu.

“Ami hakarak hadi’a situasaun saúde inan isin-rua no kosok-oan sira, atu partu ho seguru no asegura bebe moris ho di’ak. Sala maternidade ida-ne’e la’os de’it fatin partu, maibé mos hanesan sentru informasaun ba inan-aman no família sira kona-ba kuidadu bebe,” nia hateten iha serimónia inaugurasaun.

Embaixadór Japaun iha Timor-Leste, Yamamoto Yasushi, subliña katak instalasaun ida-ne’e la’os de’it edifísiu ida, maibé simboliza esperansa ba inan no labarik sira iha Lourba no área besik sira. Nia mos hateten katak komunidade iha Bobonaro hasoru dezafiu, liuliu asesu transporte iha tempu udan, tanba ne’e fasilidade ida-ne’e importante tebes.

“Ho fasilidade foun ida-ne’e, ami hein bele hadi’a taxa utilizasaun servisu saúde, ne’ebé sei kontribui hamenus mortalidade materna no neonatal iha área ne’e,” nia dehan.

Sekretáriu Autoridade Munisípal Bobonaro ba Assuntu Sosial no Organizasaun, Eng. Júlio Carvalho Caeiro, konsidera katak instalasaun foun ida-ne’e sei ajuda Governu hamenus taxa mortalidade inan no labarik. “Ba komunidade besik sira, fasilidade ida-ne’e importante tebes, tanba bele fó atendimentu lalais no efisiente ba inan isin-rua sira,” nia hateten.

Vise-Ministru Saúde ba Assuntu Fortalesimentu Institusionál, José dos Reis Magno, agradese ba Governu Japaun nia komprumisu no solidariedade hodi kontinua apoiu ba povu Timor-Leste dezde independénsia. Nia dehan katak projetu ida-ne’e reflete komprumisu Governu nian atu fortalece sistema saúde nasionál atu sai asesível liu, justu no reziliente.

“Saúde maternu-infantil sei nafatin sai dezafiu boot iha Timor-Leste, liuliu iha área rural no remota sira, ne’ebé hasoru limitasaun asesu no kualidade servisu saúde,” nia dehan.

Projetu ida-ne’e implementa husi ONG FRONTLINE ho apoiu finanseiru husi Governu Japaun, hahu iha Abril 2025 no ezekuta husi empreza lokal Afken Unipesoal Lda., ho total orsamentu USD 183,092.45.

PV_SMAONGeOC