Ohin loron Sesta 6 Febeereiru 2026, Ekipa Ponto Fokal Portal Munisipal hala’o enkontro kordenasaun ida hodi haforsa servisu iha Portal Munisipal, enkontru ne’e realiza iha sala reuniaun Munisipal, ho partisipasaun husi Ponto Fokal sira iha kada Servisu Munisipais nomos Delegasaun Teritorial. Enkontro ida-ne’e nia objetivu atu hametin koordenasaun no hadi’a kualidade jestaun informasaun iha Portal Munisipal.

Iha diskusaun, ekipa Ponto Fokal sira fahe esperiénsia kona-ba prosesu atualizasaun dadus, publikasaun notísia, no dezafiu sira ne’ebé hasoru iha implementasaun servisu Portal Munisipal. Sekretariu Asunto Sociais, nu’udar responsável sublinha katak Portal Munisipal sai hanesan meiu importante atu fornese informasaun ofisiál ba komunidade no instituisoens relasionadu sira.

Enkontro ne’e mos koalia kona-ba padraun servisu, regularidade atualizasaun kontéudu, no uza tecnologia informasaun ho efisiénsia no responsabilidade. Ekipa hatudu kompromisu atu fó atensaun liu ba verifikasaun dadus antes publikasaun, hodi garante informasaun ne’ebé loos no aktual.

Alénde  husi ne’e, partisipante sira simu orientasaun kona-ba partilha tarefa no papel ida-idak iha prosesu jestaun Portal Munisipal, hodi evita duplikasaun servisu no aumenta produtividade. Koordenasaun ne’e espera bele hamoris servisu ekipa no fó rezultadu di’ak liu ba institusaun.

Ho hala’o enkontro kordenasaun ida-ne’e, Ekipa Ponto Fokal Portal Munisipal espera bele haforsa kolaborasaun entre servisu sira no hadi’a kualidade informasaun públiku iha Portal Munisipal, nune’e komunidade bele asesu informasaun ho fasil no transparente.