Ministru Agrikultura no Peska (MAP), Pedro dos Reis, Kuarta (15/12/2021), halo lansamentu ofisiál ba atividade importasaun manu-futu hosi Indonézia iha Pontu Entrada Fronteira Terrestre, Batugade, Bobonaro.

 

Lansamentu importasaun manu-futu dahuluk hosi Indonézia ne’e ho manu hamutuk 13  no serimónia ne’e partisipa mós hosi dirijente sira ne’ebé hala’o knar  iha Fronteira Terrestre Batugade, kompostu husi Diretór  Nasional Kuarentena no Bio-Seguransa, Venâncio  de Oliveira, reprezentante Unidade Patrullamentu Fronteira (UPF), Alfándega, reprezentante Servisu Migrasaun Timor-Leste iha Batugade inklui mós  autoridade kompetente sira hosi Indonézia ne’ebé hala’o knar iha Motain nian, liuliu reprezentante Servisu Kuarentena Indonézia nian iha Motain.

Tuir observasaun Hatutan.com nian, hatudu katak iha serimónia ne’e mós autoridade Kuarentena Indonézia nian iha Motain entrega diretamente sertifikadu  importasaun manu-futu nian ne’e mai iha autoridade Kuarentena no Bio-Seguransa Timor-Leste nian iha Batugade.

Iha abertura lansamentu importasaun manu-futu ne’e, Diretór  Nasional Kuarentena no Bio-Seguransa, Venâncio  de Oliveira, importasaun ne’e iha baze legal tanba dokumentu komprovativu sira prienxe rekizitu no hetan sertifikasaun.

“Sertifikadu ne’e reprezenta legalidade importasaun manu nian. Hanesan  ita kompara ho ema karik, nia tama-mai ho pasaporte no visa legál,”   Venâncio  de Oliveira hateten.

Nia hato’o agradese ba entidade relevante sira iha Pontu Entrada Batugade, liuliu Alfándega no Servisu Migrasaun ne’ebé koopera tebetebes hodi simu importasaun manu-futu ne’e ho objetivu atu rekuperasaun ekonomia no oinsá atu fó oportunidade ba populasaun ne’ebé atu hatama manu-futu hosi Indonézia hodi hakiak iha rai-laran rasik no  bele fasilita maun-alin sira ne’ebé gosta futu-manu.

Nia afirma tan, objetivu hatama manu-futu ne’e hosi MAP la’ós atu kria jogu ka kompetisaun futu-manu, maibé oinsá rekupera ekonomia rai-laran.

Lori Kuarentena no Bio-Seguransa Timor-Leste nia naran,  Venâncio de Oliveira, hato’o agradese ba parte hotu-hotu Indonézia nian iha postu fronteira Motain ne’ebé koopera di’ak tebes hodi servisu hamutuk  hatama manu-futu mai Timor-Leste tanba ohin foin hatama manu-futu 13 mas mai tan sei barak liu ida-ne’e.

“Objetivu prinsipál husi atividade ne’e maka ita evita maluk sira hatama manu-futu liuhusi tali-laran ka tasi-laran. maibé tenke liuhusi dalan ofisial atu bele kontribui taxa ba ita-nia nasaun,” Venâncio de Oliveira hateten.

Ministru Pedro dos Reis iha nia diskursu hateten, lori Governu nia naran agradese ba Diretór Nasionál Kuarentena no Bio-Seguransa tanba kumpre orientasaun  hodi responde preokupasaun balun, liuliu  oinsá kria dalan legaliza importasaun manu-futu ho nia rekizitu no padraun legál sira mak vigora.

“Manu-futu hola parte ona ita-nia kultura. Ne’e duni ita-nia selebrasaun loron boot ka loron nasionál sira sempre autoriza atividade futu-manu. Ita  iha manu-lokál, mas agora ita tama ona iha faze ida uluk karik manu-filipina no agora ita tama ba manu ida naran madena. Entaun, dala ida tan agradese ba tékniku sira iha fronteira terrestre Batugade no Motain hosi Indonézia nian, ne’ebé bele iha vontade di’ak aselera atividade hatama manu-futu ne’e,” Ministru Pedro dos Reis hateten.

Hanesan membru Governu, Pedro dos Reis hateten, bainhira Estadu kria ona fasilidade no loke ona odamatan, favor ida komunidade no populasaun tenke redús ona atividade  liuhusi tali-laran ka liu husi tasi-laran.

“Ita nia pensamentu maka hanesan ne’e. se manu-futu ne’e ohin tama 13 iha nia rekizitu hotu.  Ha’u sei ko’alia ho tékniku sira, la’ós ita para ho manu-futu de’it, mas ita sei haree hotu animal ne’ebé mak dala-ruma iha tempu liubá hateten labele ho nia pertimbangan oioin. Atu nune’e, ema livre hatama hodi kumpre nafatin regra ne’ebé estabelese atu oituan-oituan osan tama nafatin ba ita-nia Estadu,”   Ministru Pedro dos Reis hatutan.