𝐌𝐚𝐥𝐢𝐚𝐧𝐚, 𝐒𝐞𝐬𝐭𝐚-𝐅𝐞𝐢𝐫𝐚, 𝟎𝟐 𝐎𝐮𝐭𝐮𝐛𝐫𝐮 𝟐𝟎𝟐𝟔, Sua Exelénsia Prezidente Autoridade Munisípiu Bobonaro Sr. Paulo Moniz Maia, Lic.Dir, akompaña Exelentísimu Ministru Juventude Desportu, Arte no Kultura, Sr. Nelyo Isaac Sarmento partisipa iha atividade kolleta ikan nila iha suku Raifun, ne’ebé organiza husi grupu Juventude Kreativu hakiak ikan nila.

Grupu juventude refere iha membru na’in (9), kompostu husi feto na’in (2) no mane na’in (7), ne’ebé hahú sira nia atividade hakiak ikan iha tinan 2020. Grupu ne’e rasik iha fatin hakiak ikan (kolam) ho total (9), ne’ebé prodúz ona ikan hamutuk rihun rua-nulu (20.000) resin.

Iha oportunidade ne’e, Exelénsia Prezidente Autoridade hato’o apresiasaun ba inisiativa Grupu Juventude Kreativu ne’ebé kontinua dezenvolve atividade produtiva no kria oportunidade servisu rasik ba joven sira, liu-liu iha suku Raifun.

Exelénsia Prezidente mós hato’o agradese ba Ministériu Juventude, Desportu, Arte no Kultura, liu husi Sentru Juventude Maliana ne’ebé fasilita ona formasaun relevante sira ba jovens ne’ebé iha interese ba atividade sira hanesan ne’e. Tanba ne’e, Autoridade husu ba Governu liuhusi MJDAK atu kontinua hametin Sentru Juventude sira hodi fó formasaun no apoiu ba grupu juventude sira, nune’e bele iha kapasidade di’ak liután hodi jere atividade no hametin organizasaun grupu ho di’ak.

Atividade refere partisipa husi Segundu Komandante Komando Polísia Munisípiu Bobonaro, APA Maliana, Xefe Gabinete MJDAK, Diretór Jerál Juventude MJDAK, Diretór Ezekutivu Sentru Juventude Maliana, Xefe Suku Raifun, Komunidade no Juventude sira, funsionáriu sira inklui média destakadu sira.

𝘙𝘦𝘮𝘢𝘵𝘢 “𝘔𝘦́𝘥𝘪𝘢 𝘗𝘈𝘔 𝘉𝘰𝘣𝘰𝘯𝘢𝘳𝘰”