𝐋𝐨𝐥𝐨𝐭𝐨𝐞, 𝐒𝐚́𝐛𝐚𝐝𝐮, 𝟏𝟗 𝐒𝐞𝐭𝐞𝐦𝐛𝐫𝐮 𝟐𝟎𝟐𝟔 – Sua Exelénsia Prezidente Autoridade Munisípiu Bobonaro, Sr. Paulo Moniz Maia, Lic. Dir, hamutuk ho SECAM PIDI, SECAM Asuntu Sosiais, Administradór Postu Administrativu (4); Lolotoe, Cailaco, Maliana, Bobonaro no Diretores Servisus Munisipais relevante sira, akompaña Sua Exelénsia Ministru Óbras Públikas, Sr. Samuel Marçal halo lansamentu fatuk dahuluk bá projetu reabilitasaun estrada trosu Lontas-Lolotoe.

Projetu Reabilitasaun Estrada diresaun husi Lontas bá Lolotoe ne’e kobre distánsia kilómetru 8,9km. Projetu ne’e implementa husi kompañia ho naran Jiangsu Ruiwo Construction Group Co., Ltd (China) ho totál orsamentu hamutuk $11,979,891.30 no ho durasaun tinan-ida resin.

Iha diskursu, Exelénsia Prezidente Autoridade hato’o agradese bá IX Governu konstitusionál, lideradu husi Maun Boot Kay Rala Xanana Gusmão, ne’ebé sempre tau prioridade bá povu nia difikuldade sira, liu husi halo dezenvolvimentu infraestrutura sira hanesan estrada, bee moos, eletrisidade, no fasilidade seluk tan. “𝐻𝑜𝑑𝑖 𝑝𝑜𝑣𝑢 𝐵𝑜𝑏𝑜𝑛𝑎𝑟𝑜 𝑡𝑜𝑚𝑎𝑘 𝑛𝑖𝑎 𝑛𝑎𝑟𝑎𝑛, ℎ𝑎𝑡𝑜’𝑜 𝑎𝑚𝑖 𝑛𝑖𝑎 𝑎𝑔𝑟𝑎𝑑𝑒𝑠𝑖𝑚𝑒𝑛𝑡𝑢 𝑝𝑟𝑜𝑓𝑢𝑛𝑑𝑢 𝑏𝑎́ 𝑆.𝐸 𝑃𝑟𝑖𝑚𝑒𝑖𝑟𝑢 𝑀𝑖𝑛𝑖𝑠𝑡𝑟𝑢, 𝑀𝑎𝑢𝑛 𝐵𝑜𝑜𝑡 𝐾𝑎𝑦 𝑅𝑎𝑙𝑎 𝑋𝑎𝑛𝑎𝑛𝑎 𝐺𝑢𝑠𝑚𝑎̃𝑜 𝑛𝑒’𝑒𝑏𝑒́ ℎ𝑜 𝑓𝑢𝑎𝑛 𝑜𝑠𝑎𝑛 𝑚𝑒𝑎𝑛, ℎ𝑜 𝑑𝑜𝑚𝑖𝑛 𝑡𝑜𝑚𝑎𝑘, 𝑚𝑎𝑠𝑘𝑒 𝑘𝑜𝑙𝑒 𝑛𝑜 𝑠𝑒𝑟𝑏𝑖𝑠𝑢 𝑏𝑎𝑟𝑎𝑘, 𝑠𝑒𝑚𝑝𝑟𝑒 𝑓𝑜́ 𝑚𝑜́𝑠 𝑎𝑡𝑒𝑛𝑠𝑎𝑢𝑛 𝑚𝑎𝑘𝑎’𝑎𝑠 𝑚𝑎𝑖 𝑚𝑢𝑛𝑖𝑠𝑖́𝑝𝑖𝑢 𝐵𝑜𝑏𝑜𝑛𝑎𝑟𝑜. 𝐻𝑎𝑘𝑎𝑟𝑎𝑘 𝑎𝑔𝑟𝑎𝑑𝑒𝑠𝑒 𝑚𝑜́𝑠 𝑏𝑎́ 𝑆.𝐸 𝑆𝑒𝑛̃𝑜𝑟 𝑀𝑖𝑛𝑖𝑠𝑡𝑟𝑢 𝑑𝑎𝑠 𝑂́𝑏𝑟𝑎𝑠 𝑃𝑢́𝑏𝑙𝑖𝑘𝑎𝑠, 𝑆.𝐸 𝑆𝑒𝑛̃𝑜𝑟 𝑀𝑖𝑛𝑖𝑠𝑡𝑟𝑢 𝑃𝑙𝑎𝑛𝑒𝑎𝑚𝑒𝑛𝑡𝑢 𝑛𝑜 𝑖𝑛𝑣𝑒𝑠𝑡𝑖𝑚𝑒𝑛𝑡𝑢 𝐸𝑠𝑡𝑟𝑎𝑡𝑒́𝑗𝑖𝑘𝑢, 𝑆.𝐸 𝑆𝑒𝑛̃𝑜𝑟 𝑀𝑖𝑛𝑖𝑠𝑡𝑟𝑢 𝐴𝑑𝑚𝑖𝑛𝑖𝑠𝑡𝑟𝑎𝑠𝑎𝑢𝑛 𝐸𝑠𝑡𝑎𝑡𝑎́𝑙 𝑛𝑒’𝑒𝑏𝑒́ 𝑠𝑒𝑚𝑝𝑟𝑒 𝑙𝑜𝑟𝑖 𝑎𝑚𝑖 𝑚𝑢𝑛𝑖𝑠𝑖́𝑝𝑖𝑢 𝐵𝑜𝑏𝑜𝑛𝑎𝑟𝑜 𝑛𝑖𝑎 𝑑𝑖𝑓𝑖𝑘𝑢𝑙𝑑𝑎𝑑𝑒 𝑠𝑖𝑟𝑎 ℎ𝑜𝑡𝑢 𝑡𝑜’𝑜 𝑖ℎ𝑎 𝑚𝑒𝑗𝑎 𝐾𝑜𝑛𝑠𝑒𝑙𝑙𝑢 𝑀𝑖𝑛𝑖𝑠𝑡𝑟𝑢𝑠 𝑛𝑜 𝑟𝑒𝑧𝑢𝑙𝑡𝑎𝑑𝑢 𝑟𝑒𝑎́𝑙 𝑖𝑑𝑎 𝑚𝑎𝑘 𝑜ℎ𝑖𝑛 𝑖𝑡𝑎 𝑎𝑠𝑖𝑠𝑡𝑒 ℎ𝑎𝑚𝑢𝑡𝑢𝑘 𝑡𝑎𝑛.”

Sua Exelénsia Ministru Óbras Públikas apela bá Autoridade Lokál, Líder Komunitária no komunidade sira iha Postu Administrativu Lolotoe atu koopera ho di’ak no kolabora ho kompañia ne’ebé halo reabilitasaun estrada iha fatin refere nune’e bele finaliza projetu ne’e ho kualidade tuir kontratu ne’ebé iha, hodi fó benefísiu bá populasaun iha postu refere. Aliende ne’e, Ministru Óbras Públikas mós akresenta tan katak Autoridade Lokál no Komunidade tenke tau matan bá fasilidades públiku sira ne’ebé governu oferese iha postu refere atu uza ho kuidadu nune’e fasilidade hirak ne’e bele uza bá tempu naruk.

Iha fatin hanesan, Ekipa Governu, Autoridade Munisipál, Autoridade lokál no komunidade sira hamutuk ho Prezidente Komisaun Ezekutiva BTL, E.P., Gustavo da Cruz, ofisiálmente halo mós Inagurasaun bá Projetu Melloramentu Sistema Fornesimentu Bee-Moos bá komunidade sira iha Lolotoe. Sistema foun ne’e sei garante distribuisaun bee-moos ho regulár, hodi lori benefísiu boot bá sidade urbana Lolotoe no hadi’ak kualidade moris populasaun nian.

Depoiz de halo inagurasaun sistema bee moos ne’e, Prezidente Komisaun Ezekutiva (KE) BTL, E.P, Gustavo da Cruz, hatete, Governu liu hosi BTL,E.P sei kontinua nafatin atu implementa projetu fornesimentu sistema bee moos iha kapitál postu sira iha Munisipiu Bobonaro hodi fornese bee bá komunidade iha suku no aldeia sira inklui bá fasilidade públika sira.

Aliende ne’e, Prezidente Komisaun Ezekutiva (KE) BTL, E.P, hato’o mós relatóriu bádak liga bá Projetu Melloramentu Sistema Bee Moos ne’ebé BTL,E.P implementa iha Postu-Administrativu Lolotoe Munisipiu Bobonaro. Investimentu sistema bee moos bá komunidade iha Postu-Administrativu Lolotoe ne’e hamutuk uma kain 188 ho populasaun hamutuk 1,126 no sei fornese mós bee bá fasilidade públika sira iha Postu refere.

Partisipa iha serimónia ne’e Membru Governu, Membru Parlamentu Nasionál, Prezidente Autoridade Munisípiu Bobonaro, Padre no Madre sira, Autoridade Lokál, Líder Komunitáriu, Estudante sira no komunidade sira iha postu refere.

#𝙍𝙚𝙢𝙖𝙩𝙖

#𝙈𝙚́𝙙𝙞𝙖 𝙋𝘼𝙈 𝘽𝙤𝙗𝙤𝙣𝙖𝙧𝙤