𝐌𝐚𝐥𝐢𝐚𝐧𝐚, 𝟐𝟐 𝐌𝐚𝐢𝐮 𝟐𝟎𝟐𝟔 – Sekretariu Administrasaun no Finansas Ne’ebe Representa Presidente Autoridade Munisipiu Bobonaro Partisipa iha Assembleia Geral Membrus (AGM) ho Tema “HABURAS KOOPERATIVA LIU HUSI TRANSPARANSIA NO FIAR MALU” ne’ebé realiza husi Estrutura Cooperativa Credit Union LANAMONA ba dala XVIII Tinan Fiskal 2025, iha Salaun Parókia Maliana, Postu Administrativu Maliana, Munisípiu Bobonaro.

Intervensaun husi Sekretariu Administrasaun no Finansas Autoridade Munisipiu Bobonaro, Katak Nudar Autoridade hanesan uma na’in hetan konvite ne’e hau dehan fatin ne’eba luan tebes ema barak ka lae no membro sira mos mai hotu ka lae? Maibe tamba organiza diak ohin loron ita nakonu iha fatin ida ne’e; Membro Sira mai husi Sukursal Dili, Sukursal Gleno, no Bobonaro. Uluk ami enkontru ne’e iha sala ki’ik oan ida deit, Quando ami ko’alia kona ba LANAMONA nia Edifisiu atu hari’i iha ne’e ema barak maka mosu deskonfia katak Presidente LANAMONA “Mana Mika” halo uma andar ona, temi dehan edifisiu LANAMONA ema hotu la fiar, maibe nafatin realiza konstruksaun edifisiu to’o remata, halo tan fatin ida iha Cailaco no Dili, maibe nafatin mosu hanoin ne’ebe maka deskofia husi komunidade sira. Ita ema wainhira luta atu atinje ita nia objetivu ida sempre hasoru dezafiu oi-oin maibe labele lakon esperansa no nafatin tau konfiansa ba ita nia objetivu ne’ebe maka ita iha. Maka ohin loron ita nakonu iha fatin ida ne’e tan mosu ona konfiansa, i to’o ohin loron LANAMONA nia kapital sa’e ona ba Miliaun ida pontu hitu liu. Iha biban ida ne’e mos Nu’udar Autoridade husu ba Presidente LANAMONA ho estrutura karik atu realiza Re-Estrutura Dirijentes Foun ba Periodu tinan (2026-2029), husu atu la’o ho Demokrasia, ho Nune’e membro hotu-hotu pronto kolabora ho estrutura ida foun tamba membro sira maka hili rasik.

Lia Menon ikus nu’udar Autoridade husu ba membro sira nafatin halo promosaun ba Kooperativa LANAMONA atu nafatin ba oin labele para deit iha ne’e, husu ba Estrutura tomak atu nafatin servisu maka’as ho Transparansia no Fiar malu.

Iha intervensaun husi, SEKoop hato’o katak kooperativa iha papel importante tebes ba dezenvolvimentu ekonomia no sosial iha Timor-Leste. Nia dehan katak kooperativa hanesan instrumentu importante ida ne’ebé mensiona ona iha Konstituisaun Republika Demokratika Timor-Leste hodi promove solidaridade, fiar malu no moris di’ak ba komunidade.

SEKoop mos apresia kontribuisaun bo’ot ne’ebé CU-LANAMONA fó ona ba dezenvolvimentu sosio-ekonómiku iha rai laran, liu husi servisu maka’as no espiritu fiar malu entre membrus sira. Tuir nia hateten, mudansa iha moris komunidade bele akontese bainhira iha unidade, kompromisiu no servisu hamutuk.

Nia mos esplika katak naran “LANAMONA” (Lakon Nakukun Mosu Naroman) iha signifikadu profundo no inspirativu, katak husi nakukun ba naroman, no naroman ne’e tenke kontinua nafatin no la fila fali ba nakukun.

“Durante tinan barak ita moris iha nakukun laran, maibé liu husi servisu hamutuk no fiar malu ita bele hetan naroman, no naroman ne’e tenke kontinua nafatin,” dehan SEKoop.

Serimónia abertura ne’e hetan partisipasaun husi Sekretariu Estadu Kooperativa, reprezentante Banku Sentral Timor Leste, Sekretariu Administrasaun no Finansas ne’ebé reprezenta PAM Bobonaro, Reverendu Padres, reprezentante Federasaun FENAKULENDA, Parseiro Finanseiro husi Banku BNCTL, Prezidente CU-LANAMONA ho estrutura tomak, no membrus Kooperativa husi Sukursal Cailako, Sukursal Díli, Pusat Maliana no Sukursal Gleno.

Iha Asembleia Jerál ida ne’e realiza mós Re-Estrutura Dirijentes foun ba tinan 2026-2029, no simu kedas Pose husi Sua Exelensia Sekretariu Estado das Cooperativa Sr. Eng. Arsenio Pereira da Silva.

#Média SECAM Administrasaun no Finansas