FUNSIONÁRIU PÚBLIKU TUIR FORMASAUN TOT KONA-BA IGUALDADE JÉNERU
Díli, 26–27 Marsu 2026 — Bazeia ba karta ofisiál Nú. Officio 44 DNFC/DG-SMAL-MAE/III/2026 kona-ba pedidu nomeasaun funsionáriu permanente atu partisipa iha formasaun, Diresaun Nasionál Formasaun no Koperasaun (DNFC) husi Ministériu Administrasaun Estadu (MAE) organiza atividade Treinamentu Formadór (Training of Trainers – TOT) ne’ebé hala’o iha Hotel Timor, Díli, durante loron rua.
Formasaun ne’e hetan partisipasaun husi reprezentante importante sira, inklui Diretora Servisu Munisipál Apoiu ONG no Organizasaun Komunitária, Xefe Departamentu Apoiu Sosiedade Sivil, Diretora Asaun Sosiál, no mós Administradór Postu Administrativu (APA) Balibo no Atabae. Partisipasaun husi entidade oioin ne’e hatudu komitmentu forte atu hadia kapasidade funsionáriu públiku iha área sosiál no dezenvolvimentu komunitáriu.
Objetivu prinsipál husi formasaun (TOT) ne’e mak atu reforsa koñesimentu no kapasidade partisipante sira kona-ba igualdade jéneru, inklui oinsá integra perspetiva jéneru iha planeamentu, implementasaun no monitorizasaun programa no polítika públika. Iha formasaun ne’e, partisipante sira simu materiál no metodu fasilitasaun atu bele sai formadór iha sira nia área servisu rasik.
Durante sesaun formasaun, fasilitadór sira mós fó énfaze ba importánsia igualdade jéneru hanesan fator importante atu promove dezenvolvimentu inkluzivu no sustentavel, liuliu iha nivel komunidade. Diskusaun interativu no partilha esperiénsia entre partisipante sira kontribui atu aumenta kompreensaun kona-ba dezafiu no oportunidade iha implementasaun prinsipiu jéneru iha Timor-Leste.
Bazeia ba rezultadu husi formasaun TOT ne’e, planeia ona katak sei iha kontinuasaun liu husi realizasaun formasaun iha kada munisípiu. Iha tempu badak, sei elabora planu asaun ne’ebé liga direta ba implementasaun rezultadu formasaun, atu asegura katak koñesimentu ne’ebé hetan bele aplika ho efetivu iha nivel lokal.
Formasaun (TOT) refere hetan Apoiu masimu husi Uniaun Europeia
Ho inisiativa ida ne’e, espera katak funsionáriu públiku sira bele sai ajente mudansa ne’ebé ativa iha promosaun igualdade jéneru no dezenvolvimentu sosiál ne’ebé inkluzivu iha Timor-Leste.
PV_SMAONGeOC
