ATIVIDADE SURVEY PROJETU PNDS 2026 IHA SUCO LEOHITO NO SUCO COWA
Balibo, 12 Fevereiru 2026 – Engenheiro Município hamutuk ho FPA no Ekipa Estrutura Suco PNDS (ES-PNDS) hala’o atividade survey ba projetu PNDS tinan 2026 iha Suco Leohito no Suco Cowa, Posto Administrativu Balibo.
Survey ne’e fokus liu ba proposta konstrusaun Sala Refeitóriu no hadi’a Estrada Rural sira ne’ebé mak sai prioridade komunidade nian. Objetivu husi atividade ida ne’e atu halo verifikasaun tekniku iha terenu, hare kondisaun real no asegura katak proposta projetu tuir nesesidade komunidade no planeamentu dezenvolvimentu lokal.
Iha atividade survey ne’e, partisipa mos husi lideransa no komunidade husi suco rua ne’ebé fó informasaun direta kona-ba situasaun infraestrutura iha sira nia área. Komunidade hateten katak Sala Refeitóriu importante atu suporta atividade sosial no edukativu, enkuantu Estrada Rural presiza hadi’a atu facilita asesu transporte, lori produtu agríkola ba merkadu no asesu ba servisu públiku sira.
Engenheiro PNDS Município Bobonaro hateten katak survey ne’e importante tebes molok tama ba faze planeamentu final no orsamentu, nune’e projetu sira bele implementa ho qualidade no benefisia diretu ba povu.
Ho hala’o survey ida ne’e, espera katak projetu PNDS 2026 iha Suco Leohito no Suco Cowa bele realiza tuir planu no kontribui ba dezenvolvimentu sustentavel iha nivel Suco no Posto Administrativu Balibo.
Kontinuasaun programa husi atividade survey ne’e normalmenti inklui etapa sira hanesan tuir mai:
Primeiru, analiza no validasaun dadus survey. Ekipa tekniku sei halo relatoriu husi rezultadu survey iha terenu, inklui medida tekniku, estimasaun orsamentu (RAB) no prioridade projetu.
Segundu, reuniaun validasaun ho komunidade no lideransa Suco. Proposta projetu Sala Refeitóriu no Estrada Rural sei diskuti fila fali atu hetan aprovasaun final husi komunidade, nune’e projetu ne’e loos tuir nesesidade povu.
Terseiru, submisaun proposta ba nivel superior (Município/Nasional) tuir mekanismu PNDS, atu hetan aprovasaun no alokasaun orsamentu tinan 2026.
Kuartu, prosesu implementasaun projetu, ne’ebé inklui:
- Preparasaun dokumentu tekniku final
- Prosesu aprovizionamentu (se presiza)
- Involvimentu komunidade iha konstrusaun
- Monitorizasaun no supervizaun tekniku
Ikus mai, entrega no jestaun fasilidade ba komunidade, liu husi estrutura suco ka grupu jestaun atu garante manutensaun no sustentabilidade projetu.
Objetivu husi kontinuasaun programa ne’e atu asegura katak projetu laos deit konstrui, maibé bele funsiona ho di’ak no fó benefísiu duradouru ba komunidade iha Suco Leohito no Suco Cowa.
