Maliana, 09 Fevereiru 2026, Conselho Cordenasaun Municipal (CCM) Bobonaro hala’o enkontro kordenasaun iha Salaun Maria Tapo Administrasaun Munisipal Bobonaro. Enkontro ne’e ho objetivu atu hametin kooperasaun entre instituisaun governamentál sira iha nivel munisipál, hodi asegura implementasaun programa dezenvolvimentu la’o ho di’ak no tuir planu ne’ebé define ona.

Presidente Autoridade Munisipal Bobonaro, Paulo Moniz Maia, Lic. Dir, iha ninia intervensaun fó enfáze ba dirijentes sira atu kordena, avalia no hametin liña kordenasaun servisu. “Enkontro ida ne’e atu  hametin liña koordenasaun hodi hare progresu servisu, susesu nomos dezafius ne’ebé servisus Munisipais ho delegasaun servisu sira infrenta”. Nia hatete.  

Iha okaziaun ne’e Presidente Autoridade Munisipál Bobonaro hateten katak enkontro KKM importante loos atu garante katak servisu públiku ne’ebé fó ba komunidade la’o ho efetivu no responde ba nesesidade povu. Nia mos hato’o apelu ba instituisaun hotu atu kontinua servisu hamutuk ho espírito responsabilidade no transparénsia.

Enkontro ne’e hetan partisipasaun husi Presidente Autoridade Munisipál Bobonaro, núdar Presidente Konsellu Kordenasun, Sekretariu Munisipal nain tolu (3), Diretor/a Servisu Munisipal, Diretor Delegasaun Territorial, Administrador Posto 6, representante xefe Suku 6 husi Posto 6 no ajénsia relevante sira iha munisipiu Bobonaro. Durante reuniaun, partisipante sira diskute kona-ba progresu implementasaun programa governu, desafio sira ne’ebé enfrenta, no estratéjia atu hadia koordinasaun inter-institusionál.

Liuhosi enkontro ida ne’e, espera katak koordinasaun entre setor sira iha nivel munisipál bele aumenta no kontribui ba dezenvolvimentu sustentavel hodi prepara simu politika desentralizasaun administrative iha Munisipiu Bobonaro.