𝗞𝘂𝗮𝗿𝘁𝗮-𝗙𝗲𝗶𝗿𝗮,𝟭𝟲 𝗦𝗲𝘁𝗲𝗺𝗯𝗿𝘂 𝟮𝟬𝟮𝟲 – Sua Exelénsia Prezidente Autoridade Munisípiu Bobonaro, Sr. Paulo Moniz Maia, Lic. Dir, partisipa iha audiénsia públika entre Ministériu Administrasaun Estatál (MAE) ho Komisaun C, iha Parlamentu Nasionál; kona-bá Proposta Lei 29/VI/3ª.

Iha intervensaun, Sua Exelénsia Ministru Interinu MAE, Jacinto Rigoberto Gomes de Deus, perante audiénsia públiku afirma katak, proposta lei Rejime Jerál Taxa Administrativu, MAE rekoñese ida ne’e hanesan oportunidade ne’ebé Parlamentu Nasionál fó ba membru Governu sira atu kontribui iha prosesu lejislativu, atu halo esklaresimentu kona-bá asuntu sira ne’ebé ho nia natureza tékniku no institusionál.

Lei Rejime Jerál das Taxas Administrativas, sei reforsa kolesaun reseitas fiskais no konsolida integridade Administrasaun Públikas, ida ne’e sei redúz espasu prátika korupsaun no ilísitas.

Ministru Interiñu hatutan liután katak, Pozisaun Ministériu Administrasaun Estatál kona-bá Proposta Lei ne’e hafoin halo análiza konklui katak proposta ne’e la iha impaktu direta ba kompeténsia sira Ministériu Administrasaun Estatál nomós ba Lei Finansas Munisipál no Poder Lokál.

Ministériu Administrasaun Estatál konsidera katak, ida ne’e sei haforsa kapasidade Institusionál Munisípiu sira no hakbi’it Munisípiu sira nia kapasidade Autonomia Administrativu Finanseira hodi halo likidasaun, kobransa, fiskalizasaun no monitorizasaun ba reseitas sira ne’ebé mak sei rekolla, sei harmoniza liután Taxa Munisipais, no sei fó kompeténsia atu Munisípiu sira iha Autoridade Administrativu no Finanseira rasik.

Ministériu Administrasaun Estatál fiar katak proposta lei ne’e sistematiza ho prinsípiu sira ne’ebé rekoñesidu ona husi órdem jurídiku Timor oan sira nian ho rigór no lolós, espesialmente ba rejime taxa Munisipál nian, reprezenta kontribuisaun pozitivu ida atu reforsa seguransa jurídiku, transparénsia no administrasaun di’ak iha ita-nia rai. Iha espíritu kolaborasaun institusionál ne’ebé di’ak.

Ministériu Administrasaun Estatál preparadu atu implementa lei ne’e husi Parlamentu Nasionál. Ministériu sei la deside se lei ida ne’e konveniente ka lae atu implementa, maibé Ministériu nia knaar atu asegura nia ezekusaun. La haree ba difikuldade prátika ka administrativa, Ministériu sei buka atu kumpre no implementa desizaun lejislativa sira ne’ebé aprova ona.

Ministériu Administrasaun Estatál, fiar katak implementasaun Rejime taxa Administrativa tenke implementa ho abordajen ne’ebé transparante, proporsionál no ekitativu, hodi garante katak kobransa taxa sei suporta sustentabilidade no kualidade servisu públiku, maibé la sai barreira ba asesu sidadaun sira, liu-liu ba komunidade vulnerável no área rurál.

Ikus liu, atu hatete katak Proposta Lei ne’e adekuadu no artikuladu duni ba rejime taxa Munisipál nian, dispozisaun husi rejime ne’e rasik la iha implikasaun ba Lei Finansas Munisipál ne’ebé iha.

Objetivu husi Proposta Lei 29/VI/3.ª Rejime Jerál Taxa Administrativu ne’e mak atu unifika taxa no envolvimentu hotu ne’ebé ministériu sira kobra no Parte husi Reforma Fiskál ne’ebé Ministériu Finansa anúnsia husi tinan 2022 —2023 atu habelar baze tributária no kombate frauda.

#Remata

#Media PAM Bobonaro