Maliana, Kinta-feira no Sesta-feira, 30-31/07/2026.
Exelénsia Prezidente Autoridade Munisipál Bobonaro, Sr. Paulo Moniz Maia, Lic.Dir, hamutuk ho Sekretáriu Autoridade munisipál nain tolu, Diretór servisus munisipais, no Administradór Posto Administrativu nain 6, hala’o konfirmasaun no aprezentasaun dadus ba ekipa avaliadór husi Ministériu Administrasaun Estatal ne’ebé lidera husi Diretór Nasionál Administrasaun no Finansas Sr. Acilino Manuel Branco, iha Salaun Maria Tapo Autoridade Munisipál Bobonaro.
Iha abertura, Exelénsia Prezidente Autoridade, hodi Povu no Autoridade Munisipál tomak hato’o agradese ba Governu Sentrál liu husi Ministériu Administrasaun Estatal ne’ebé forma ona ekipa avaliadór ba Avaliasaun faze segundu nian, ho avaliasaun dahuluk Bobonaro hetan Muito Bom, no mós iha rekomendasoens husi ekipa avaliadór mai Autoridade Munisipál. “Iha avalisaun dahuluk Bobonaro hetan Muito Bom, iha vizita husi Sua Exelénsia Primeiro Ministro Kay Rala Xanana Gusmão, ne’ebé Autoridade halo aprezentasaun mós hetan Muito Bom, nune’e ami sei esforsu maka’as liután hodi mantein valor ne’ebé ami iha ka sei halo di’ak liután iha avaliasaun ba daruak ne’e nian. Ami lakoi atu optimista liu hodi hanoin katak Bobonaro mak liu hotu, maibe ami mós fiar ho ami nia esforsu, servisu sira ne’ebé ami halo durante ne’e, no ami nia preparasaun sira hodi simu poder lokál.”
Segundu Avaliasaun ba Dezempeñu Estrutura no Kapasidade Institusionál Autoridade Munisipiu Bobonaro nian konstitui instrumentu importante iha prosesu nasionál, preparasaun ba implementasaun Desentralizasaun Administrativu no Instalasaun órgaun reprezentativu Poder Lokál. Avaliasaun ida-ne’e hala’o hodi kontinua no aprofunda rezultadu husi avaliasaun dahuluk ne’ebé realiza iha fulan Dezembru tinan kotuk, no mós hodi fó baze téknika, institusionál no evidénsia ne’ebé objetivu ba prosesu tomada desizaun Governu nian.
Tanba ne’e, avaliasaun ida-ne’e sai nu’udar mekanizmu tékniku ba MAE atu monitoriza progresu, identifika lakuna institusionál, define nesesidade apoiu tékniku, orienta kapasitasaun Rekursus Umanus, no prepara munisípiu Bobonaro ba transferénsia graduál responsabilidade no funsaun sira iha prosesu desentralizasaun.
Rezultadu husi avaliasaun ida-ne’e sei fó informasaun importante ba Governu Sentrál, liuliu ba Ministériu Administrasaun Estatál no liña ministeriais relevante sira, atu determina munisípiu sira ne’ebé kumpre ona kondisaun mínimu institusionál hodi hakat ba faze ikus husi desentralizasaun administrativu no instalasaun órgaun reprezentativu Poder Lokál.
Rezultadu ne’e mós sei uza atu identifika munisípiu sira ne’ebé presiza apoiu adisionál, formasaun téknika, reforsu institusionál, mellora sistema administrativu no akompañamentu kontínua.
Ho ida-ne’e, Segundu Avaliasaun la’ós de’it prosesu avaliasaun administrativu, maibé mós parte husi prosesu Nasionál atu haforsa governasaun lokál, no Autoridades Munisipais, hadi’a kualidade prestasaun servisu públiku, promove transparénsia no responsabilizasaun, no asegura katak munisípiu sira prontu atu simu responsabilidade boot liu iha kuadru desentralizasaun no Poder Lokál.
#Remata
#Media PAM Bobonaro
